Kosova nuk pret njohje të shpejtë të pavarësisë nga Serbia, të cilës nuk i ka dërguar as kërkesën për njohje, por pret që Beogradi të mos hapë probleme dhe të bashkëpunojë me Kosovën, si dy vende të pavarura, në fusha të interesit të përbashkët, ka deklaruar në një intervistë për televizionin Alsat, ministri i Jashtëm kosovar, Skënder Hyseni.
Ministri Hyseni nuk është i sigurt nëse Serbisë do t'i dërgohet gjatë vitit 2009 ftesa për njohjen e pavarësisë.
"Çështja e njohjes së Republikës së Kosovës nga ana e Serbisë është çështje më delikate, shumë komplekse dhe nuk besoj që do të ndodhë në një të ardhme të afërt. Si do që të jetë mos njohja reciproke nuk duhet të pengoj bashkëpunimin mes Republikës së Kosovës dhe Republikës së Serbisë në fusha të ndryshme të interesit të përbashkët si dy shtete sovrane të pavarura. Ka shumë fusha që të dyja shtetet kanë interes të bashkëpunojnë", tha Hyseni. Hyseni pret një rritje të shteteve që do të njohin Kosovën në vitin 2009. Vetëm në pjesën e parë të vitit ai pret që numri i njohjeve të arrijë në 70. "Jam i bindur se do të jenë më shumë se 70 shtete, dhe gjithsesi numri i vendeve që do ta njohin Kosovën gjatë vitit që po hyjmë do të jetë numër i madh dhe numër i cili Kosovës përfundimisht do t'i garantoj një proces të sigurt të aplikimit për anëtarësim në të gjitha institucionet kryesore financiare dhe politike ndërkombëtare", vijoi Hyseni. Kryediplomati pranon se pengesa më e madhe e njohjeve edhe gjatë vitit 2009 do të jetë Serbia e ndihmuar nga Rusia dhe ndonjë shtet tjetër, por kjo nuk do t'i pengoj institucionet që të jenë të suksesshme në proces.

Derisa aviacioni ushtarak ka kryer për të nëntën ditë me radhë sulme ajrore kundër Hamasit në Rripin e Gazës, trupat tokësore të Ushtrisë së Izraelit kanë filluar të hyjnë në Rripin e Gazës, kanë konfirmuar zyrtarë të kësaj ushtrie.
"Pak kohë më parë kemi nisur fazën e dytë të operacioneve kundër infrastrukturës së Hamasit", ka thënë zëdhënësi i ushtrisë izraelite Avital Leibovich për CNN.
Kurse zëdhënësi i ministrisë së jashtme izraelite Palmor tha se ofensiva vazhdon të drejtohet vetëm kundër militantëve palestinezë.
"Ne kemi luftë me Hamasin, jo me banorët e Gazës, jo me popullin palestinez. Qysh të dielën në Gazë kanë mbërritur 10.000 tonë ndihma humanitare, më shumë do të pasojnë ditët e ardhshme. Nuk ka kufizime, pikëkalimet kufitare punojnë me kapacitet të plotë në shërbim të ndihmës humanitare", ka thënë Palmor. Ky është këndvështrimi i qeverisë izraelite, por ka informacione nga pala palestineze që nuk mund të përputhen me të. Në fakt ushtria izraelite vrau të shtunën në mënyrë përzgjedhëse Abu Zakari Al-Xhamalin, një anëtar militant të Hamasit, por viktima të konfliktit midis Izraelit dhe Hamasit u bënë përsëri edhe civilë. Në mbrëmje aviacioni ushtarak rifilloi me sulmet ajrore. Në to u shkatërrua një xhami në Beit-Hanun në veri të Rripit të Gazës. Autoambulanca transportuan të plagosurit në klinika, viktima të tjera u nxorën vetëm të vdekur.
Ndërkohë punonjës të organizatave humanitare në Gazë druajnë se një operacion i zgjeruar ushtarak do ta keqësonte edhe më shumë gjendjen e civilëve. Në raportin e tyre javor Kombet e Bashkuara informojnë për mungesën e grurit. Shumica e mullinjve dhe e furrave janë detyruar të mbyllen. Pothuajse nuk ka më bukë për të blerë, u tha nga ana e OKB-së. Sipas saj, shumë familje janë pa rrymë elektrike dhe pa ujë, sepse infrastruktura është shkatërruar gjatë sulmeve ajrore izraelite.
Gjatë sulmeve që kanë filluar nëntë ditë më parë, besohet që më shumë se 25 për qind nga 450 palestinezët e vrarë ishin civil të pafajshëm. Ndërsa sipas Izraelit, 80 për qind prej atyre që janë vrarë ishin militant të Hamasit. Katër izraelitë janë vrarë nga sulmet me raketa nga Gaza. Ndërkohë mijëra palestinezë kanë marrë pjesë në demonstrata në Bregun Perëndimor në përgjigje të thirrjes së Hamasit për të protestuar kundër sulmeve izraelite në Gaza. Disa nga protestuesit gjithashtu akuzuan presidentin palestinez, Mahmoud Abbas se nuk po ngrihej në mbrojtje të popullit të Gazës. Në Jerusalemin lindor, të rinj palestinezë qëlluan me gurë forcat izraelite të sigurisë që u përgjigjën me gaz lotsjellës. Ministrja e Jashtme e Izraelit, Tzipi Livni ka thënë se Izraeli do të vazhdojë ofensivën përderisa militantët palestinezë nuk ndalojnë sulmet me raketa në Izrael.

Vritet Nizar Rayyan
Një udhëheqës i lartë i Hamasit është vrarë nga një sulm ajror izraelit në Gaza. Nizar Rayyan dhe gjashtë të tjerë humbën jetën kur shtëpia e tij u bombardua. Ai kishte argumentuar së fundmi në favor të rifillimit të sulmeve kamikaze. Izraeli thotë se ka si objekt sulmi lëvizjen islamiste Hamas pasi militantët vazhdojnë të qëllojnë me raketa në Izrael. Sulmi më i fundit izraelit shkatërroi ndërtesën e parlamentit dhe ministritë e drejtësisë, transportit dhe arsimit. Numra të shumtë tankesh dhe trupash izraelite janë mbledhur në kufi me Gazën.Kryeministri izraelit, Ehud Olmert, tha se Izrael nuk po planifikon atë që ai e quajti luftë të gjatë në Gaza.

Bush kërkon armëpushim nga Hamasi
Sipas fjalëve të presidentit George Bush, SHBA-ja po vazhdonë përpjekjet e saj diplomatike për të arritur një armëpushim efikas në konfliktin mes Izraelit dhe Hamasit. Ai bëri thirrje për aksione të fuqishme për të parandaluar armatosjen me raketa të Hamasit dhe grupeve të tjera. Bush në fjalimin e tij të fundjavës në radio bëri fajtor Hamasin për eskalimin e dhunës. "Izraeli vetëm ka reaguar. Sulmet me raketa nga Organizata palestineze radikale islamike janë akte terroriste", tha presidenti amerikan. Misioni i ndërmjetësimit i Bashkimit Evropian në Lindjen e Afërme do të fillojë të dielën. Ministrat e jashtëm të Çekisë, Francës dhe Suedisë do të udhëtojnë fillimisht për në Kairo, u pohua në Stokholm dhe në Bruksel.

Autoritetet kroate akuzuan 23 persona përfshirë nëntë profesorë të një universiteti, për marrje rryshfetesh në këmbim të notave më të mira. Zyrtarët kroatë të anti-korrupsionit thanë se profesorët kishin marrë rryshfete për të dhënë nota kaluese për studentët e ekonomisë në Universitetin e Zagrebit, pavarësisht nga përgjigjet e tyre në provime apo edhe në mungesë të pranisë në to. Midis të dyshuarve është ish deputetja Desa Mlikotin-Tomiç, e cila më parë ka kryesuar Komisionin parlamentar që heton konfliktet e interesave që përfshijnë zyrtarët dhe agjencitë qeveritare. Policia bëri kontrolle në disa universitete edhe në shtator si pjesë e hetimeve. Bashkimi Evropian e cilëson korrupsionin si një fenomen të përhapur dhe të ngulur thellë në shoqërinë kroate dhe ka paralajmëruar se është një nga pengesat kryesore të planeve të Kroacisë për anëtarësim.

Për kryetarin e Partisë Demokratike të Kosovës, njëherësh kryeministrin e Kosovës, Hashim Thaçi, sfida për vitin 2009 mbeten prioritetet e qeverisë së tij, kurse në lidhje me zgjedhjet e përgjithshme, ai ka thënë se, "nuk sheh ndonjë mundësi që ato të mbahen, siç kërkon opozita".
"Zgjedhje lokale do të ketë në nëntor, ndërsa unë jam për respektimin e kushtetutshmërisë dhe konsensusit ndërpartiak. Kërkesat për zgjedhjet nga këta individë nuk janë serioze, por janë më tepër sa për të bërë zhurmë. Ata nuk janë në favor të organizimit të zgjedhjeve dhe e dinë se do të ndahen edhe më keq sesa në zgjedhjet e 17 nëntorit. Me këtë sjellje destruktive të këtyre individëve, qytetarët edhe atë besim prej 7 apo 8 për qind do t'ua marrin në zgjedhjet e ardhshme", ka deklaruar Thaçi për Radion Evropa e Lirë. Ndërkaq nënkryetari i LDK-së, Lutfi Haziri ka thënë se, "edhe LDK-ja pret që të jetë e gatshme për zgjedhjet lokale në vjeshtën e vitit 2009, por jo edhe për zgjedhjet parlamentare".
Në anën tjetër, partitë opozitare, synim kryesor kanë përgatitjet për zgjedhjet në të dyja nivelet. Duke u thirrur në pakon e Ahtisaarit, këto parti presin që zgjedhjet lokale dhe ato parlamentare të mbahen në vjeshtë. Ahmet Isufi, nënkryetar i Aleancës për Ardhmërinë e Kosovës, thotë se zgjedhjet e lira janë të domosdoshme për realitetin e ri që është krijuar në Kosovën e pavarur.

Gjashtë persona janë lënduar në dy shpërthime që kanë ndodhur të premten në mbrëmje në pjesën e banuar me shumicë serbe në qytetin e ndarë të Mitrovicës.
Policia thotë se shpërthimi i parë ka ndodhur në afërsi të një kafeneje në veri të Mitrovicës duke dëmtuar shtatë makina. Incidenti nxiti reagimin e dhunshëm të një grupi serbësh, të cilët i vunë flakën dyqanit të një shqiptari, në Lagjen e Boshnjakëve.
Shpërthimi i dytë ndërkaq ndodhi në këtë lagje, derisa zjarrfikësit po përpiqeshin të shuanin zjarrin. Tre nga të lënduarit nga ky shpërthim janë zjarrfikës. Jeta e tyre është jashtë rrezikut, thonë mjekët e spitalit në veri të Mitrovicës. Zëdhënësi i policisë në Mitrovicë, Besim Hoti nuk ka dhënë hollësi për motivet e dy shpërthimeve të mbrëmshme. Situata është qetësuar pas shtimit të masave të sigurisë nga ana e paqëruajtësve të NATO-s dhe policisë së EULEX-it. Ditëve të fundit, veriu i Mitrovicës është përfshirë nga një valë incidentesh të motivuara etnikisht.
Më 30 dhjetor, në dy incidente të ndara, një i ri serb dhe një i ri shqiptar u plagosën, ndërsa u dogjën disa dyqane dhe makina të shqiptarëve. Autoritetet e Kosovës kanë dënuar incidentet në Mitrovicë dhe u kanë bërë thirrje qytetarëve që të vetpërmbahen nga dhuna.

Presidenti i Serbisë, Boris Tadiq ka deklaruar se Kosova nuk ka ardhmëri evropiane si shtet i pavarur, "por vetëm si krahinë brenda Serbisë".
Në një intervistë për agjencinë Fonet, Tadiq ka thënë se incidentet e fundit në Kosovë përforcojnë qëndrimin e Serbisë se, "në Kosovë nuk respektohen të drejtat njerëzore, para se gjithash ato të popullatës joshqiptare - sidomos të serbëve".
"Iluzioni se Kosova, me popullatë dominuese shqiptare mund të bëhet një shtet i respektuar dhe hapësirë e civilizuar, ku njerëzit mund të jetojnë të lirë pavarësisht përkatësisë së tyre etnike, bie në ujë", ka thënë Tadiq. Ai ka thënë se pas vlerësimit të Gjykatës Ndërkombëtare të Drejtësisë rreth ligjshmërisë së pavarësisë së Kosovës, do të krijohen mundësitë për një proces të ri negociator - por jo për t'u destabilizuar rajoni. "Serbia nuk dëshiron të ketë konflikt, por zgjidhje që nënkupton zhvillimin, qëndrueshmërinë dhe ruajtjen e integritetit territorial të saj", ka thënë ai.