Tetovë, 4 janar - Shpifjet dhe akuzat kundër Komandantit dhe deputetit tonë, Daut Rexhepi-Leka, janë të pabaza dhe i konsiderojmë shpifje me të vetmin qëllim - humbjen e vlerave të UÇK-së dhe njollosjen e ushtarëve të saj. Kështu thuhet në reagimin e ish-ushtarëve të Batalionit të parë të Ushtrisë Çlirimtare Kombëtare - Brigada "112 - Mujdin Aliu" të Tetovës, që mban vulën e Shoqatës për Mbrojtjen e Vlerave të Luftës (SHMVL). "Ne ish-ushtarët e UÇK-së, si dhe votuesit e zonës (Tetovë-Jazhincë) dhe më gjerë që zgjodhëm Daut Rexhepin-LEKA përfaqësues në Parlament, reagojmë ashpër ndaj shpifjeve dhe etiketimeve që i bëhen komandantit dhe deputetit tonë, nga ana e liderit të PDSH-së, Menduh Thaçi, me stilin e tij tashmë të njohur, arrogant dhe të papërgjegjshëm. Lajmi për largimin nga radhët e PDSH-së, të z.Daut Rexhepi-LEKA, na brengosi dhe na irritoi, sepse në mënyrë senzacionale dhe me doza të theksuara krenarie u publikua nga një gazetë maqedonase "Dnevnik", e njohur për shkrimet e saja anti-shqiptare", thuhet në reagim. SHMVL akuzon kreun e PDSH-së se në të njëjtën gazetë, ka luajtur rolin edhe të prokurorit duke shtuar edhe akuza të tipit shpifëse me të cilat e ngarkojnë deputetin tonë nga organet e ndjekjes sllavo-maqedonase, dhe duke u mburrur se partia po pastrohet nga luftëtarët, gjegjësisht nacionalistët. "Ne ish-luftëtarët e UÇK-së, duke u solidarizuar edhe me elektoratin e zonës, jemi të shqetësuar dhe kemi humbur besimin edhe tek kjo parti, e cila së paku deklarativisht trumbetonte për mbrojtjen e vlerave të luftës dhe mburrej duke numëruar pjesëtarët e UÇK-së që kishte në gjirin e saj. Pikërisht sot, në kohërat më të vështira për pjesëtarët e UÇK-së dhe familjet e tyre, që çdo ditë maltretohen, burgosen dhe etiketohen me lloj-lloj shpifjesh, PDSH e finalizon këtë frymë anti-shqiptare me largimin nga PDSH-ja, te ish-Komandantit dhe deputetit tonë Daut Rexhepi-LEKA. Vallë a mund të mendohet se edhe rasti i Daut Rexhepit-LEKA është rastësi apo ...?", theksohet në këtë reagim. Në vazhdim, SHMVL akuzon edhe kreun e BDI-së, Ali Ahmeti, duke theksuar se për të njëjtin, bastisjet dhe burgosjet e shqiptarëve janë "punë mizash". "Deklaratat e z.Thaçi janë ofenduese, identike si deklaratat e z.Ali Ahmetit, i cili ushtarët e UÇK-së i quan miza, duke e quajtur vetveten shqiponjë. Siç duket për këtë të fundit, pra, z.Ahmeti edhe bastisjet, maltretimet dhe burgosjet në masë të madhe që janë bërë dhe që janë duke u bërë familjeve shqiptare dhe ish-ushtarëve të UÇK-së, na qenkan punë mizash?! Shihet qartë se dy liderët e dy partive kryesore shqiptare për një çështje janë të koordinuar për t'u LIRUAR nga ish-ushtarët e UÇK. Sepse ashtu më lehtë depërtojnë te objektivi i tyre MADHOR, që është pjesëmarrja në pushtet, dhe servilizmi ndaj bllokut maqedonas", thuhet në reagim.
Ish-ushtarët e Batalionit të parë të Brigadës "112 - Mujdin Aliu" në fund të reagimit përmendin sukseset dhe sigurinë në zonën e tyre, që siç thuhet në reagim, me Lekën në krye nuk është shënuar asnjë vjedhje, plaçkitje me armë, rrëmbim, rrezikim prone, reketim ose dhunë. "Për skaj të gjitha këtyre që u përmendën, qëllimi kryesor dhe i arritur nga ana jonë ka qenë ruajtja e dinjitetit, moralit dhe nderit të familjes shqiptare. Andaj nuk do të lejojmë askënd që të hedhë baltë mbi figurat dhe veprat e ish-ushtarëve të UÇK-së, në veçanti mbi personalitetin e Komandantit, sot deputet z.Daut Rexhepi-LEKA", thuhet mes tjerash në reagimin e SHMVL-së.