Evis HALILI
Shkup, 9 mars - Burra dembelë dhe gra punëtore. Shifrat flasin në favor të këtyre të fundit. Edhe pse më të pakta në numër, femrat përbëjnë kapacitetin më të madh të fuqisë punëtore. Duke iu referuar evidencave zyrtare të Statistikave, numri i femrave të punësuara i afrohet atij të meshkujve, ndonëse këta të fundit përbëjnë numrin më të madh të fuqisë punëtore aktive. Në luftë për pavarësi ekonomike dhe dominim të barabartë, apo nevoja ekonomike të cilat nuk mund të përballohen vetëm nga kryefamiljari.
Roli gjithnjë e më aktiv i gruas jashtë familjes shpjegohet edhe si pjesë e procesit të emancipimit që ka nisur, sidomos dhjetë vitet e fundit, gjë që reflektohet edhe me shtimin e numrit të femrave të punësuara në sektorin publik dhe privat.
Lënia mënjanë e rolit të shtëpiakes dhe aktivizimi në sektorin publik dhe privat, po e shndërron femrën në protagoniste të fuqisë punëtore. Demografi Asllan Selmani vëren se trendi i punësimit të femrave është më aktual gjatë dekadës së fundit, jo vetëm për pjesën maqedonase, por edhe shqiptare.
"Punësimi ka marrë përmasa të mëdha dhe është një tregues pozitiv, që jo vetëm është pjesë e procesit të emancipimit, por edhe do të ketë një reflektim pozitiv të vetë këtij procesi", thotë Selmani. Sipas evidencave, grupmoshat prej 25 deri në 49 vjeç përbëjnë numrin më të madhe të femrave të punësuara, aktive mbeten edhe mosha 50 deri në 64 vjeç, ndërkohë që grupi nga 15 deri në 24 vjeç janë më të pakta në numër.
Sektorët që regjistrojnë numrin më të madh të të punësuarve, në përgjithësi janë industria e përpunimit të lehtë dhe ushqimore, biznesi i madh dhe i vogël, ndërsa sektorët më pak të "preferuara" për të dy gjinitë janë peshkimi dhe organizatat e huaja. Duke iu referuar katërmujorit të fundit të 2009, në Maqedoni numërohen mbi 900 mijë persona, që janë pjesë e popullsisë aktive, prej tyre mbi 600 mijë janë të punësuar, shifër kjo që ka pësuar një rritje të lehtë krahasuar me të njëjtën periudhë të një viti më parë. Statistikat zyrtare konstatojnë se numri i të papunëve është në ulje. Popullsia pasive, dominohet nga femrat, numri i të cilave është gati dyfish më i madhe sesa i meshkujve.