Fitim KRYEZIU
Shkup, 4 janar - Bashkimi Demokratik për Integrim (BDI), ka filluar që në të gjitha sektorët të largojë punëtorë shqiptarë të punësuar nga përbërja e kaluar qeveritare. Në këtë fillimvit, në shënjestër ishin shqiptarët e Fondit Pensional të Maqedonisë ku janë shkarkuar 47 punëtorë persona, vetëm pse nuk kanë qenë aktivistë të kësaj partie. Kështu së paku mendojnë punëtorët e larguar, Agim Luta dhe Agron Çajani. "Jemi futur në zyre e këshilltarit të drejtorit gjeneral, dhe aty nga një person i quajtur Bashkim, i cili është këshilltarë i tij, na ka thënë se ju i keni zënë vendet e BDI-së. Për atë shkak ju duhet t'i lironi ato, sepse u kemi borxh aktivistëve tanë. Kështu ka dhënë urdhëruar drejtori Hisni Jakupi". Kështu për gazetën KOHA transmetojnë këtë bisedë të përjashtuarit nga puna Luta dhe Çajani. Ata shtojnë se kjo ka ndodhur përkundër kontratës për punë, e cila ka qenë valide deri më 9 janar të këtij viti.
Në mungesë të drejtorit Hisni Jakupi, gazeta KOHA kontaktoi me personin Hamdi Mustafa, i cili prezantohet të jetë zëvendësdrejtor për çështje kadrovike në Fondin pensional. Emri i tij figuron edhe në vendimet për pushimin nga puna të këtyre 47 personave. Ai mohon akuzat se largimi i tyre ka të bëjë me revanshizmin partiak. "Këta persona kanë qenë të punësuar në bazë dhe në pëlqimit të cilin e ka dhënë Ministria e Financave së bashku me Agjencinë për punësime të përkohshme që para 6 muajve, dhe pëlqimi i kësaj ministrie ka qenë deri më 1 janar. Këtu nuk bëhet fjalë për largime partiake, por vetë ardhja e tyre ka qenë partiake", thotë Hamdi Mustafa.
Në bisedë me të mësojmë se numri i shqiptarëve të punësuar në këtë institucion është vetëm 15 për qind. Në pyetjen tonë, pse atëherë ky numër në vend që të rritet në 25 për qind, sa edhe duhet të jetë përfaqësimi i shqiptarëve në të gjitha institucionet e shtetit, zvogëlohet, Hamdi Mustafa s'ka përgjigje. Për shpjegime të mëtutjeshme Mustafa na drejtoi të kërkojmë në Ministrinë e Financave dhe në Qeverinë e Maqedonisë.

DR fajëson BDI-në për përjashtimin

Demokracia e Re kërkon nga partia shqiptare në pushtet, që të parandalon largimet e shqiptarëve nga puna siç është rasti i fundit me 45 të punësuarit në Fondin Pensional, por edhe në shumë vende të tjera. "Këto janë vetëm disa nga argumentet ku tregojnë se në partin shqiptare në pushtet nuk po funksionon asgjë. Ndërsa nga ana tjetër zëvendës-kryeministri për implementimin e Marrëveshjes së Ohrit, thotë se janë duke rritur numrin e shqiptarëve ne administratën shtetërore, por faktet tregojnë diçka tjetër", thuhet në reagimin e DR-së. Sipas kësaj partie, me këto largime, qartë shihet se BDI nuk është në gjendje t'i mbron vlerat dhe interesat e shqiptarëve në Maqedoni. "Partia shqiptare në pushtet vazhdimisht është duke përsëritur se janë duke punësuar shqiptarë të shumtë në administratën shtetërore, projekte këto të cilat janë paraparë që të përfundojnë shumë më herët, se të njëjtat rrjedhin nga Marrëveshja e Ohrit, dhe se një gjë e tillë nuk duhet të jetë marketing politik, por obligim i tyre. Nga drejtuesit shqiptar mund të dëgjohet se Marrëveshja e Ohrit është duke ecur në drejtimin e duhur, të dhëna të cilat janë kryekëput të pa vërteta", thuhet më tej në reagimin e kësaj partie. Sipas DR-së, edhe pse BDI është futur në qeveri për t'i mbrojtur vlerat e shqiptarëve të Maqedonisë, ata një gjë të tillë deri më tani nuk janë duke e bërë. "Këto janë vetëm disa nga shenjat e qarta të cilat do të ishin të mjaftueshme që partia shqiptare në qeveri ta ndez dritën e kuqe dhe të fillon të vetëdijesohet për t'i parandaluar këto dukuri anti-shqiptare", thuhet në fund të reagimit të Demokracisë së Re.